SHEAR REVIVAL- Northern Light Matte Paste

---

[𝗠𝗔𝗧𝗧𝗘 𝗣𝗔𝗦𝗧𝗘]

喺story第一次問大家想睇邊隻review多啲，由於Shear Revival 嘅票數較多，今日就一於講講依隻我覺得算係幾全面，但又唔算好特別嘅產品。

品牌：Shear Revival
產地：USA 🇺🇸
試用產品：Northern Light Matte Paste (3.4Oz)

Overall: 7.5/10 (Recommended)
光澤：4/10 （Neutral)
軟硬度：4/10 ( Light to Medium)
持久度：7/10 (Medium to Strong)
柔順度：-/10
清洗：7/10 ( Easy)
香味：介乎於hkhomebrew同firsthand 之間嘅草本味，類似柑橘檸檬
適用於: 日常，表現平均

由品牌講起先嘅話，Shear Revival會係一隻比較著重頭髮健康嘅手造品牌。🇺🇸美國製造，成份天然🌿而且清楚寫哂喺官網，對於冇讀chemistry 嘅我嚟講都會增添信心。

包裝唔算得上話好特別，但個人認為恰到好處，簡潔而且每款出品都有畫唔同嘅畫，再比個好靚嘅名佢。雖然每隻風格都好似，但依隻北極光/ 北方的光芒💫(亂譯 Northern Light 🤣）都幾唔錯，望落尚算有格調。

香味上面講咗，都係啲健康草本味，帶啲🍊🍋柑橘檸檬味。未去到firsthand 嗰種咁強烈，又濃過hkhomebrew 少少。我覺得冇乜點，唔算香唔算臭，而且上頭之後自己唔係好聞到，唔係一種好搶嘅味道。

使用上同其他Matte Paste一樣，滑身好推，喺掌心容易搽得均所以唔會上頭一撻撻，依個十分重要。上手上頭輕至中重量，算係適合唔同髮質。唔會好快乾，黐性足夠，可以黐到彈出嚟嘅頭髮，但隔冇耐會有少少天線頭出現。不過，因為佢唔乾身唔重身同自然光澤，大家使用份量落多啲都唔係問題，唔會好笠好塌，相信可以黏得哂啲頭髮。整體嚟講都算容易塑形同埋可以重塑。

效果方面冇Odouds Matte Paste甚至造型粉咁乾咁啞色，我覺得係自然光澤，未算Matte。層次感同豐盈感表現不錯，唔算係超強，但都提供到自然嘅texture同volume。

持久力同硬度又係medium，出街冇話好快塌，但又唔好expect佢長期勁hold。始終香港濕氣重💦，依隻matte paste又唔會收乾哂個頭，唔打底唔落spray嘅話唔會超持久。尋日落咗成日雨，過幾個鐘黏力明顯有減少，但成個頭個形狀都keep到，我自己就覺得佢嘅hold力夠用，喺咁濕嘅情況之下，keep到都已經算唔錯。

清洗方面🚿，清水沖得走大部分，加洗頭水輕鬆搞掂。

Overall嚟講，全部範疇都唔錯，乜都介乎喺中間至中上表現，但又冇邊樣能力特別超強，算係周身刀🔪，張張都少少利，係值得推介嘅產品。如果有一日你諗唔到想要咩特別效果，唔係想特別硬，唔洗特別hold，唔洗特別啞色，唔洗乜乜乜，嗰日用依隻就啱喇。

以上都只係個人睇法，始終每個人嘅喜好、感受，甚至係髮質都唔同。如果有啲咩意見或者分享，歡迎留言或者PM我哋交流一下心得🥰🙏🏻