REF- Rough Wax

---

[𝗪𝗔𝗫]

高手用嘅髮蠟？

唔講成份，一般髮蠟都可能會比較油，有光澤同冇咁快乾，比較強hold力。今次review嘅產品，又同一般嘅理解有冇分別呢？

品牌：REF 🇸🇪
產地：Made in China 🇨🇳 
試用產品：Rough Wax (2.87 Oz)
Haircut: @isme_jessielam 

Overall: 6.5/10 (Average )
光澤：7/10 (Medium)
軟硬度：7/10 (Medium)
持久度：8/10 (Strong)
柔順度：1/10 
清洗：8/10 (Easy)
重塑：不能 （有片）
香味：普通洗手液香味（假假哋嗰啲花香）
特色：極快乾，難塑型，但特久力強，較適合短髮如spiky頭，或長髮逐少使用

[包裝]
同上一次review嘅REF Pomade一樣，只係改咗顏色嘅北歐簡約風，唔算特別但都算靚仔。吸引到我嘅反而係佢包裝上嘅指示同埋自我評價，你哋知啦， 🤣 BROMADE最鐘意睇吓佢地有冇講大話㗎嘛。

從圖2所見，包裝上佢哋比自己hold同volume滿分，光澤0分，非常值得考究🧐 。另外，佢嘅官方建議係apply to wet or damp hair，而唔係好似平時咁吹乾頭用。下面會講吓點解濕用比較好。

[使用過程]
上手即刻感覺到好重身，勁黏身。捽開唔算容易但都唔難，始於都係似cream狀嘅產品(圖3)。不過超級快乾❗️❗️阿哥一上手，捽開冇耐，已經感覺到佢開始收乾。第一次用嘅時候乾頭使用，完全唔夠時間塑型，仲好扯頭髮。結果死死氣跟番佢指引，✅ 半乾半濕嘅時候使用，問題先稍有改善。

重點係，就算係半濕頭落，依隻產品都好快乾，令我嘅頭髮迅速地變硬，想再摷兩吓都有啲困難。所以大家見到，今次阿哥個頭嘅形狀有啲古怪，因為我試咗幾次，都唔夠時間塑型就乾咗了。

另外因為佢太快乾而且黏性強，使用時好扯頭髮。細佬試過上頭一梳，即刻扯住哂，🚫 梳都梳唔到。大家梳嘅話應該會甩唔少頭髮。

[效果]
個頭乾嘅時候使用已經有一定光澤，更何況我濕用吖。最大扣分位就係依度。扣分並唔係因為佢有光澤，而係因為佢聲稱0 shine但有光澤，仲要唔係low shine，係真係幾令吓。有圖有真相啦，🤔 大家會見到硬嘅一束束令頭髮。

Volume嚟講，其實因為佢本身都幾重身，過一陣都有慢慢塌嘅跡象。依方面我相信佢做到，只不過可能因為重身，會塌得有啲快，有啲失望。

要讚嘅係佢嘅hold力同持久力好強✅。阿哥用咗佢之後其實有去跑步，跑完個頭都仲係好硬好扯住嘅質感。依方面可以彌補到佢重身嘅不足。大家睇一睇好短嘅片會見到，就算我整個頭，佢到會彈番去原位。強hold持久但重塑力零。

[氣味及清洗]
氣味唔識形容，好普通洗手液會聞到嗰種香味。清洗有驚喜，就咁用水沖得乾淨。咁強力咁乾但好易洗，👍🏻 值得一讚。

我之所以話係高手用嘅髮臘，係因為使用過程要快狠準，而且好易扯甩頭髮要小心。效果其實幾強力而且易洗，但同佢聲稱嘅no shine 同volume能力有出入，所以評分較一般。

以上都只係個人睇法，始終每個人嘅喜好、感受，同髮質都唔同。如果有啲咩意見或者分享，歡迎留言或者PM我哋交流一下心得🙏🏻