Hair House Barbershop
by Adam Chan
HAIR HOUSE BARBERSHOP by Adam Chan
Barber: 阿哥- Ray @raybarber_hk (灣仔秀華坊)，細佬- Zippo @zipppo (中環),
多謝大家一路嘅支持。嚟緊BROMADE會有啲轉變，😭 所以忍痛決定今次係最後一次嘅BROMADE Barbershop Review 喇！
今次我哋決定回到最初的起點，去返我哋兩兄弟一開始接觸barbershop culture 💈嘅鋪頭！
Hair House Barbershop by Adam Chan，相信各位剪開 barbershop 嘅師兄都會聽過，而我哋兩兄弟一開始去barbershop剪頭髮就係搵佢地！唔知道睇緊BROMADE 嘅你地一開始又係去邊度剪呢？
📍Hair House Barbershop 於2013年創立，可以話係香港barbershop 界嘅先頭部隊。Barbershop 文化可以喺香港發展到，Hair House 絕對係功不可沒。老闆 Adam Chan 有多年豐富理髮經驗，都教咗好多好師傅出嚟。Adam 係一位好有親和力嘅Barber，雖然暫時未有機會搵到佢剪，BROMADE 同佢現階段都只係網友關係🤣 不過就算透過社交媒體同佢傾偈都發現佢好肯同我哋交流意見，甚至乎係傾吓生活、傾吓香港現況，同時亦都好支持我哋🙏🏻 對住佢，有一種同偶像講嘢嘅感覺。
Adam 好鍾意香港本土文化🇭🇰，亦都將佢放入舖頭嘅裝修同埋自家品牌- 飛仔 FADEJAI。無論喺舖頭定產品包裝都經常見到屬於香港人回憶嘅嘢，好似李小龍先生、老夫子，香港電影等等嘅標誌性人物角色。
Hair House Barbershop 有中環同灣仔兩間分店。細佬去咗中環分店搵Zippo，阿哥就去灣仔搵Ray 剪。
環境：
1. 灣仔秀華坊：曾經喺秀華坊有個舊舖位，搬舖之後環境舒服咗。樓底更高，唔會有壓迫嘅感覺，感覺都闊落咗。另外，仲有阿 Ray 養嘅芝娃娃看門口🐶。佢叫做寸B，你剪緊頭嗰時佢唔會理你，但到你走嗰吓佢就會係咁吠你攞尾彩，勁寸！
2. 中環：位於中環一條好隱蔽嘅小窄巷，再行樓梯上2樓。感覺好似搵一間人細小店咁，嗰份神秘感都幾正，但就感覺冇咁high class。上到去就比起灣仔細啲，感覺舊啲，但裝飾都幾似。特別嘅係有塊大點板寫咗同畫咗啲理髮教學喺上面。
兩間舖頭嘅裝修同埋Barber 嘅制服都呈現咗幾唔同嘅風格。中環蘭桂坊嗰間偏向西式經典風格，Barber 着起牛仔工人服；灣仔秀華坊香港本土感覺比較強烈啲，
設備：
1. 洗頭🚿：獨立一個洗頭床，要稍移玉步。
2. 飲品🥤：有一般飲品之餘，仲有得飲飛仔 FADEJAI 同素啡 SOFEE COFFEE合作出嘅一款手沖咖啡，幾特別幾有feel ☕️
BARBER:
Ray: 要早兩至三星期book 🤭 真係誇張。Adam自從去咗外地之後，阿Ray可以話係香港打理得比較多嘅barber。第一次剪佢，發覺佢剪頭髮好自如，感覺好輕描淡寫，動作有信心，😌 輕鬆就剪完嘅感覺。佢提到當初香港未興barbershop 嘅時候，多數都係外國人嚟剪，所以去到依家，佢有一半客人都仲係外國人。所以，頭髮幼嘅師兄可能可以試吓搵阿Ray剪，相信佢會幾擅長。阿Ray睇完我嘅示意圖，有再詳細問我想點剪。例如個fading，前陰，頭頂。所以大家真係會剪到你想要嘅效果。
Zippo: 細佬特登搵返當年（三年前）幫我剪嘅 Zippo! 原來佢都仲認得我，個感覺都幾微妙🤣 大家不妨喺佢嘅 account 睇吓搵唔搵得返細佬🤭 今次我就繼續剪 low fade, 出到嚟個效果都好滿意。Zippo 成個剪髮過程都幾快，冇乜多餘嘅動作，剪好頭髮之後都會教下我點吹同埋點打理👍🏻 另外佢用 razor 都幾快狠準，而且我係冇敏感同痕嘅感覺☺️ 成個剪頭髮嘅過程大概45分鐘左右。
品牌：飛仔 FADEJAI - BROMADE 之後就會有 更多product review，密切留意！
時間🕣：有 Booking System，可以上網直接 make appointment，睇到 available 時間。準時開始，剪頭髮過程60分鐘多啲左右。
Hairhouse作為龍頭barbershop，我哋睇番哂環境，效果，價錢，產品等等，走咗個大圈嘅 BROMADE，覺得依一間係其中一間好代表到香港嘅barbershop，同時亦都性價比幾高，幾啱第一次想試barbershop嘅人，去感受一下比較英式港味嘅理髮體驗。
最後一句，係我哋BROMADE做 product/ barbershop review 成日講嘅一句，冇話最好最正嘅barbershop ，希望大家搵到適合自己嘅就得！嚟緊BROMADE有咩變化，就請大家留意住喇！
Haircut: $340
地址 : 灣仔- 秀華坊23號地鋪; 中環- 蘭桂坊德仁立街20號
營業時間:
Mon.- Sat. 1100-2000
Sun. Close
以上都係我哋個人意見，如果有唔同睇法歡迎留言或者DM我哋交流吓！
