長文注意⚠️: 此計劃並非廣告，本專頁完全以客人角色介紹及評論Barbershop。以下內容係根據我哋兩兄弟所觀察及與barber傾計所寫出嚟，並不代表Barbershop 立場。我哋嘅Review 會描述踏入鋪頭後嘅過程同細節，如果各位巴打有另外想知嘅嘢，我哋都會盡量答。

樂道理髮公司 Too Far East Barber & Co. @toofareastbarber 
日期: 11/03/2020
Barber: 細佬- Benny, 阿哥- Kelvin

簡單講吓樂道點解叫樂道，英文又點解叫Too Far East。店主之一嘅Benny話，英文名稱來自一句英文諺語: Too far east is west。意思大概係行到最遠嘅東邊，其實就係西邊。佢覺得依句說話好反映到佢同另一位店主Kelvin 做Barber嘅journey。而依個剪頭髮甚至係人生嘅旅程行過嘅道路，就係佢哋快樂嘅道路，樂道。所以，大家千祈唔好去咗尖沙咀嘅樂道喇 ，地址係本文章最低！

整個剪頭髮過程可以分做幾part：踏入門口—> 坐低hea吓攞嘢飲—> 剪髮—> 洗頭—> 吹頭—>造型。當然過程中都有同barber 閒談傾吓計啦！

環境：
1. 一入到去鋪頭個感覺就已經好舒服、好relax。鋪頭用咗白色同綠色作為主調，咁啱就係我哋兩兄弟都好鍾意嘅綠色💚 裝修風格就似現代版上海理髮廳💈
2. 白燈為主，好光猛亦好闊落💡
3. 鋪頭唔同角落都種咗啲綠色植物，令到鋪頭有啲生氣🎍聽講全部都係Benny種嘅
4. 阿哥特登拜會咗個廁所。乾淨嘅

設備：
1. 洗頭盆：每個剪頭髮座位前面都有洗頭嘅位置，Barber會轉一轉張凳背向洗頭盆，然後調整張凳嘅角度就可以洗頭，唔洗行唔洗郁。小弟上網睇過外國barbershop，好多都會直接揼低個頭就洗，咁嘅方法就會令到成塊面都濕晒，而TFE依個洗頭方式就令到我哋好舒服。
2. 飲品：唔同種類嘅汽水、紙包飲品，甚至乎啤酒都有。咁啱小弟落車行去鋪頭行到有啲熱，飲罐啤酒真係特別爽。(P.S. 有個Drink Tips嘅玻璃樽喺附近，大家隨心🤪)
3. 熱毛巾：剪完頭會比你自己敷吓同埋抹乾淨塊面同頸。覺得真係熱得滯🥵小心燙手🧖🏻。
4. 熱shaving cream 機：呢樣野幾特別，小弟未試過。熱嘅shaving cream令毛孔擴張, 有助barber做shaving嘅時候剃得更加順滑。

BARBER:
Overall: 手法純熟而且溫柔，同時亦都好細心留意每個細節。誇張講句，感覺到佢地係逐條頭髮剪咁。兩位Barber都有因應兩兄弟頭型同髮型作出微調，唔係機械式操作，亦都真係有記住我哋有咩concern。喺依段抗疫期間，佢哋都有消毒好啲用具先剪。靚唔靚你哋就自己睇相判斷啦😌 兩兄弟其實十分滿意，特別係個fading做得非常好，細佬剪完之後係忘我境界咁瘋狂照鏡。

Kelvin: 說話較少，但英文好好J (聽講係加拿大番嚟 )。阿哥感想：比佢剪嘅時候好感受到佢嘅力量，佢會比較大力咁hold住你個頭，落剷亦相對快同狠。因為佢身形比較高大，阿哥見到佢好多時都有少少彎住腰剪頭髮。小心條腰啊！

Benny: 爆晒紋身嘅手同佢溫柔嘅手法，有一個強烈嘅對比。閒談之間feel到佢對所有事物嘅respect 。同佢講開做barbershop review, 佢好鼓勵我哋去做，由心感受到佢係希望推廣整個文化，而唔係推廣自己。🤜🏻🤛🏻Peace。

時間🕑：佢哋有booking system，而每一個time slot都係一個鐘，實際剪落都係一個鐘多少少。全程都好舒服、同barber有講有笑、洗下頭，轉眼就過咗成個鐘。 但就因為佢對每一個客人都係咁，所以比原本book咗嘅時間遲咗半個鐘左右先開始剪（依個時候可以飲吓嘢）。加上佢剪個頭又用一個鐘多啲，結果我哋留咗喺樂道都有兩個鐘。所以就唔太適合趕時間，或者唔太鐘意留喺barbershop好耐嘅bros喇。

最後好想講，兩兄弟好睇得出兩位 barbers互相欣賞嘅態度之外( 佢哋有喺度讚對方剪得好) ，亦都好尊重salon同行以及其他barber。佢哋甚至叫我哋下次唔好番嚟住，感受吓其他香港barber之後先再嚟交流。可能，依個都係too far east is west嘅精神同意思。

另外想講多句，對唔住啊Miles @milesyipak , 我哋得兩個頭咋，冇得試你手藝😔 樂道，好高興認識你們！多謝你哋肯俾我哋任影唔嬲！

Haircut: HK$380

地址：中環威靈頓街15號4樓C室 (Unit C, 4/F, 15 Wellington St, Central)

營業時間：
Mon - Fri (1100-2030)
Sat (1100-1800)
Sun Closed

以上都係我哋個人意見，如果有唔同睇法歡迎留言或者dm我哋交流吓！

Where should we go next time?