長文注意⚠️: 此計劃並非廣告，本專頁完全以客人角色介紹及評論Barbershop。以下內容係根據我哋兩兄弟所觀察及與barber傾計所寫出嚟，並不代表Barbershop 立場。我哋嘅Review 會描述踏入鋪頭後嘅過程同細節，如果各位巴打有另外想知嘅嘢，我哋都會盡量答。

Happy Barber Shop HK @happybarbershophk
日期: 08/04/2020
Barber: 細佬- Heman & Christina , 阿哥- Edward

首先簡單講吓佢哋嘅背景先啦！開業大約四個月，已經有唔少人認識嘅佢哋，位於觀塘，可以話十分方便附近番工嘅客人。佢哋係少有有男仕美容嘅Barbershop ，所以都吸引到我哋特登由屯門去到咁遠拜訪一下！

老實講，一開始見到Happy Barbershop 依個名，覺得個名都改得有啲hea喎⋯⋯不過！佢哋叫得 happy barber shop, 我哋兩兄弟又真係剪得好開心，亦好開心認識到佢哋。

我哋循例都問一問店主 Edward，喂老闆，除咗想令客人開心之外，Happy Barbershop 背後仲有冇咩理念㗎？Edward話，我都好偱例咁答你啦：冇啊，就係咁簡單，大家開心。

Edward之後都有再分享，原來喺過去學剪頭髮直到開鋪，做Barber都經歷過一啲唔開心嘅時候，所以同佢老婆Christina一齊開咗依間Happy Barbershop，希望 Barber同客人，都可以喺度感受到快樂。

現時主要由兩位Barber坐陣嘅 Happy Barbershop，究竟係點呢？睇埋落去啦！

環境：
1. 成間 barber shop 都好光猛，白光管再溝少少黃燈💡空間好大、好闊落，感覺好舒服。
2. 剪頭髮嘅範圍，位與位之間都有好足夠嘅空間，唔會有好壓迫嘅感覺。
3. 有晒政治立場，黃到金。店舖有晒唔同嘅文宣，係要懲罰下！
4. Logo: 老闆娘畫嘅，我哋拎咗兩個貼紙。

設備：
1. 洗頭盆🚿：每個剪頭髮座位前面都有洗頭嘅位置，Barber會轉一轉張凳背向洗頭盆，然後調整張凳嘅角度就可以洗頭，唔洗行唔洗郁，同我哋之前去嘅樂道一樣。
2. 飲品🥤：包裝飲品、汽水啤酒一應俱全，全部免費。早知飲多幾罐🤗
3. 熱毛巾：洗完頭直接敷埋，溫度適中，蠍魔蜘！
4. Barber椅：老實講佢哋嘅櫈唔係好舒服，有啲硬，同埋腳位好似唔啱，坐得唔係好自然。洗頭同修眉嘅時候有啲唔係好知點好🤣
5. 企燈：每個位有一枝燈，等Barber睇得仔細啲，影落又靚啲。

BARBER:
Overall: 兩位barber都喺另一間較出名嘅barbershop出嚟，手法同感覺都偏向比較美式少少，會有相對sharp嘅outline 同實淨嘅感覺。入鋪之前有消毒同量體溫，但剪頭髮之前，兩兄弟冇見到佢哋消毒用具嘅步驟，建議依個時勢，點都係客人面前做番足，加強信心。

Edward: 老細，但玩得，而且好樂於教人。我哋兩個一到嘅時候，見到Edward教緊一眾弟子剪頭髮，一人一個假頭係度練習。剪髮過程佢提及到，一般人嚟剪頭髮，最著重可能係個fading（小弟就係依種人！），但佢比較著重整體容易打理，希望客人剪到想要嘅髮型同時，都想客人輕易打理。Overall 感覺流暢，而且都有問清楚想要點樣嘅效果先開始剪。佢剪頭頂同剪陰嘅時候，會撥啲頭髮向前面，搞到我塊面都有幾多頭髮碎。好彩，佢好快都有用番爽身粉keep住幫我掃番走啲頭髮，剪完仲有送個新口罩比我添。另外，Edward曾經喺上海理髮店學過理髮，可能因為咁，剃刀技術較為出色，冇用cream剃完都全完冇敏感/痕。

Heman: 後生、冇架子、真係好好傾嘅一個barber, 同時亦都好funny🤣 剪髮嘅過程都細聲講大聲笑。就算剪完之後都有WhatsApp 傾吓計😚, 好開心識咗個朋友🥳 手法都好純熟同溫柔，會因應我想要嘅髮型再做微調，等我容易啲蠟頭👍🏻 原來佢哋有留意開我哋嘅 review, feel到我哋嘅心機🔥同時都好鼓勵我哋繼續俾心機做。剪完之後，阿哥發現有少少fade位未係修得好圓滑，細佬自己都覺得成個髮型同想像中有少許出入，不過細佬個頭型比較難剪。21歲嘅佢，相信未來會愈來愈進步，大把世界。

Christina (Beautician): 另外，呢間barbershop 有男士美容服務，咁啱細佬就想修一修條眉好耐，就試吓老闆娘手勢！擁有多年美容經驗嘅佢，雖然係掹眉毛但就冇乜點痛！修完都sharp醒晒。不過因疫情關係美容服務會暫停兩星期，所以暫時未有得修住喇。

時間🕣：準時開始，過程45至60分鐘左右，傾吓傾吓就完咗👌🏿 Booking System有待改善，暫時只可以whatsapp約，冇得睇available 時間，有啲麻煩。

最後同Happy barbershop 講句，我哋剪完真係好happy！

Haircut: $340
Eyebrow: $220
地址 : 觀塘駿業里8號世貿大樓1402室
營業時間: 
Mon - Sat (0900-2000)
Sun Closed