Barbershop Review又番嚟喇！眾多兄弟都係咁問我哋今次去邊間，有咩提議，你哋又俾我哋fake到喇😌 今次嘅題材同以往唔同！ BROMADE今次特登搵咗兩位女Barber🧑🏻 👱🏻‍♀️深入探討女性點樣係男人堆🧔🏻 👦🏻 👨🏻 入面工作，並且透過我哋嘅感覺，話比大家知”女Barber” 究竟有冇咩唔同，會唔會有咩特別之處呢？

兩兄弟特別搵咗兩間唔同 barbershop 嘅女barber。細佬搵咗 Handsome Factory 嘅 Cherry ；而阿哥就搵咗 Neighbor Barbershop 嘅 Jessie。同以往嘅Barbershop Review 唔同，因為今次主要想集中探討吓女barber喺事業、工作上嘅經歷同心路歷程，並唔係兩間 barbershop 嘅比較，🙏🏿 😉 希望大家唔好誤會！

感覺和印象
作為毒男嘅BROMADE，比起搵男Baber，搵女Barber剪頭髮其實都會有啲怕醜。比如話 Cherry，成身都有唔同圖案嘅紋身，戴住口罩唔笑cool cool哋咁，就咁睇已經型過我哋多多聲。又比如話Jessie，望落去好abc，陣間比佢yo我我都唔識反應咁就尷尬啦。相信大家可能都會有類似嘅感覺同印象，好似都係搵番男仔剪，會舒服啲同好傾啲咁。但其實又係咪呢？

過程
成個過程同比男barber剪有冇咩唔同？話冇就呃你嘅，但兩位女barber就同我哋本來嘅印象有啲唔同喇。

對話過程之中，原來好型嘅Cherry，同埋比較abc feel嘅Jessie，其實都係好活潑同埋幾鍾意笑嘅人嚟。老實講，同佢哋對話，可能仲暢所欲言過同男barber。你哋知啦，有啲男barber又係鬼死咁型，同佢哋傾計又係有壓力嘅。依兩位女孩子都毫無架子，而且好易笑同幾講得笑，所以 BROMADE剪髮過程都傾得幾開心。不過，其實有人鍾意剪頭髮靜啲，又有人會喜歡同 barber傾計，所以都冇話好定唔好，希望大家搵到啱feel嘅barber咁就得喇。

剪髮過程女仔真係溫柔啲？錯！男女一樣都溫柔。喺過往印象中，女仔剪頭髮可能會比人感覺溫柔過男仔。我哋今次要幫眾多男barber討回公道，因為男barber們好多都好溫柔！喺依個層面上，我哋覺得性別唔係一個因素去影響一位barber嘅手法。男barber都會有溫柔手法，同時都有力量型嘅女barber。

另外，我哋發現兩位女 Barber同樣喺 styling 方面會落多啲心機，由pre-style, 真正styling 去到 post-style都做得好仔細。我哋有特別問到女仔會鍾意邊幾款味道嘅pomade，佢哋分享話有好多男仔客人都會特登買女仔鍾意嘅味道嘅產品。所謂女為悅己者容，其實相反男仔剪個靚頭都會想俾自己同另一半/女仔覺得型啲、精神啲，我哋覺得女barber喺依方面可能提供到女仔角度嘅意見👍🏻 ，剪出一個女仔喜歡嘅髮型。

除咗剪髮之外，佢哋都提供咗好多頭髮護理嘅方法俾我哋，依啲可能就係男女barber之間嘅分別喇？

她們的經歷- 受歧視？
其實兩位女barber 所遇過嘅事可能大部分 barber 都會遇過——受質疑。無可否認，站喺客人角度，相信大家都會觀察Barber嘅外表、神情、動作等，去大概感受到 barber 對自己有冇信心，係一個點嘅人。而男女barber最大嘅分別在於，有部分客人會純粹因為佢哋嘅性別，而立即質疑佢嘅能力。會質疑女仔剪唔剪得掂男仔個頭㗎，你都冇鬚你點識剃鬚啊咁，類似嘅諗法。

Cherry 同 Jessie異口同聲，都話有過唔少類似嘅經歷。兩位都分別有提及過，外國人對女barber嘅質疑反而比本地人多。其實唔出奇㗎，我哋睇番唔少外國網上對female barber嘅評價，有好多人都會話: “risky!”，甚至有人會話，barbershop 係男人嘅地方，女人唔應該入嚟。喺度，我哋都尊重唔同人嘅睇法。老實講，有時冇女仔喺度，成班男人講吓咸濕笑話，又或者鬧吓女朋友，都咪話唔爽。不過，我哋畀兩位女Barber剪完之後，就絕對唔覺得女仔唔識剪男仔頭！

兩位女孩子好坦誠咁同我哋講，佢哋其實都有唔開心㗎 🙁 但都好坦然咁話，”可以點吖，咪剪好個頭，比佢知女仔剪男仔頭係得㗎囉！💪 ” 其實，女barber所受到嘅質疑，可能比男barber更多。心態決定境界，如果喺barbershop 剪得耐嘅女barber，一路面對嘅壓力都真係唔細。反而我哋喺度諗，比人歧視都可以一直留喺度繼續剪，咁應該剪得好好先有得留低喎……

細心留意Cherry 件制服嘅話，你會見到寫住010。原來，係handsome factory 嘅編號。老細阿Ball就係001, 而Cherry著住件10號仔波衫。你哋可以想像到，喺有20幾就快30個barber 嘅handsome入面，著住件10號都真係大師姐嚟㗎喇。

Jessie 就同Cherry剪嘅年資差不多，都係兩三年左右。不過，Jessie就已經得到過唔同barbershop 嘅垂青，去過唔同嘅地方剪頭髮㗎喇！去過唔同barbershop 剪，試過又學過嘅嘢又會廣泛啲。所以話如果單純見到人哋係女仔，就話人唔識剪，就真係比較膚淺了。

製成品
同以往一樣，我哋唔會刻意比較唔同barber嘅技術，但兩兄弟其實都幾滿意兩位女barber嘅製成品💯 詳情大家可以睇番相喇，fading同成個structure 都很不錯。

總結
搵完Cherry同Jessie剪頭髮之後，我哋兩兄弟都覺得其實女 barber依條路一啲都唔易行，甚至覺得比起男 barber行得更加艱苦，備受客人性別歧視嘅質疑但係依然堅持，單單係依份精神已經好值得尊重同支持。更何況佢哋都剪得令我哋好滿意！ 

男女barber嘅細心程度一樣，而且都有溫柔派同力量派，但女barber經歷過嘅可能比男barber更多。

最後，其實我哋覺得唔需要再講女barber定男barber了。因為Barber依個term，其實就包括哂男同女啦，唔需要覺得女仔喺barbershop出現有咩特別吖！如果要比較，不如互相學習，互相尊重仲好啦！

題外話，由於我哋喺父親節時間去剪。Handsome barbershop 喺連卡佛搞pop up store又幾有創意喎。而Neighbour Barbershop就有老豆節送禮環節，睇到唔少客人都攞住獎品走，有趣有趣。

Shop at: http://www.bromadehk.com

Instagram: @bromade_hk 

以上都只係個人睇法同埋對2位barber嘅感受，唔能夠以偏概全，始終每個人嘅喜好、感受，甚至係髮質都唔同。如果有啲咩意見或者分享，歡迎PM我哋交流一下心得🙏🏻

.

#bromade #bromadehk #handsomefactory #neighborbarbershop #femalebarber #madeinhk #pomade #pomadehk #hkpomade #clayhk #hairstyle #pomadereview #grooming #mensgrooming #menhaircuts #menshair #barbershop #hkbarber #hkbarbershop #lowfade #hk #brother #haircut #gentleman #hkig #hongkong #香港 #髮型 #油頭 #髮油