長文注意⚠️: 此計劃並非廣告，本專頁完全以客人角色介紹及評論Barbershop。以下內容係根據我哋兩兄弟所觀察及與barber傾計所寫出嚟，並不代表Barbershop 立場。我哋嘅Review 會描述踏入鋪頭後嘅過程同細節，如果各位巴打有另外想知嘅嘢，我哋都會盡量答。

LWD BARBERSHOP
日期: 06/05/2020
Barber: 細佬- Cyrus , 阿哥- Desmond

BROMADE 帶大家去完港島同九龍剪頭髮，今次帶大家去到有牛🐮嘅地方，屯門！對上兩個Barbershop Review分別位於中環同觀塘，今次嚟到大西北，除咗地點唔同之外，成個格調同之前兩間都好唔同！

講吓 LWD Barbershop 嘅背景先啦！原來，LWD早於2015年就已經開業，前身係LWD Studio，除咗剪髮仲有皮革製作，不過依家就得番barbering 服務嚕。位於屯門工廠大廈嘅佢，店舖附近嘅環境其實唔太理想，地點唔算十分方便。不過，入到去舖頭簡直係另一個世界。見到LWD依個縮寫其實都估到係同合夥人姓名有關㗎喇，而佢哋嘅logo，正正係老闆之一Desmond嘅側面剪影，幾型㗎🤪。
.
環境：
1. 成間 barber shop 都比較暗，只有剪頭髮嘅位置比較光猛。直接用燈膽而唔係用射燈，環境嚟講好有格調，但有機會令 barber睇得冇咁清楚。
2. 空間好大、好闊落，放咗梳化、結他amp同桌球枱，仲有部電單車係中間添。
3. 舖頭有電結、木結他、bass，鼓之外，牆上仲放咗好多外國著名歌手或者樂隊嘅黑膠碟。Desmond 表示佢好鍾意儲好舊但仲有價值仲function到嘅物件。因此，成間舖都好有vintage嘅感覺。
4. 我哋去到舖頭門口嘅時候已經聞到 @reuzelhongkong 粉紅豬香薰蠟燭嘅味道，味道同成間鋪可以話係完美配合。一入到去就令到我哋好放鬆。

設備：
1. 洗頭🚿：獨立一個洗頭床。
2. 飲品🥤：飲品汽水一應俱全，全部免費。
3. 熱毛巾：冇熱毛巾提供，但就會喺洗頭嘅時候會用暖水濕咗嘅毛巾幫你抹面。
4. 樂器及設施：細佬同Desmond jam咗陣結他，成個環境好有feel。另外有得篤波，不過某一邊唔係好夠位。

BARBER:
Overall: 剪頭髮之前有消毒剪髮工具。手法好溫柔而且細心，另外值得一讚嘅就係洗頭技術👍🏻，比過往我哋去嘅barbershop 更流暢同舒服，又唔會整濕其他地方。不過唔好誤會，係唔會按摩嘅🤣 成個過程係先洗頭，剪髮後再洗頭。

Desmond:
斷斷續續剪咗12年頭髮。剪髮嘅時候除咗fading之外，佢有特別幫我重新塑造前陰嘅層次，令小弟個前陰無論向左掃向右掃，都唔會太大分別，花咗唔少心思。剪前陰左手會放喺我額頭遮住，一邊右手就咁剪，所以冇頭髮跌落塊面，十分細心。

另外要提及嘅係Desmond 係一個快刀手🔥。冇用cream嘅情況下，用剃刀剃清髮根嘅時候速度極快，手起刀落，仲剃埋耳仔啲毛，係一個好有趣嘅體驗。番到屋企有少少痕，係正常嘅現象，唔係傷口嚟。

比佢快速剃完之後，佢會再帶我去洗頭，利用暖水嘅熱力，係洗頭盤度再剃清髮線(逆根咁剃）。今次亦都係小弟第一次係洗頭盤比人剃頭髮。

Cyrus: 俾咗張low fade嘅相佢睇，就真係剪返張相咁🤣👍🏻。唔同嘅detail位佢都會特登問我嘅意思，例如係額頭嘅outline 想唔想sharp, 想唔想𠝹坑等等。喺用razor嘅時候，都feel到Cyrus 比起其他barber剃得快，不過就喺Cyrus 第二次幫細佬用暖水洗頭嘅時候， feel到左邊滴水附近位置有少少乸，不過整體來講問題唔大。剪完晒成個頭，styling 嘅時候Cyrus幫我梳咗個比較高身嘅髮型。細佬自問唔太carry 到呢一款造型🤢，所以之後自己都梳番低啲。

另外，Cyrus幫我做咗個black mask, 幫助去黑頭同去角質層。做完塊mask之後佢再幫我修吓啲面毛，細佬好滿意！
P.S. Cyrus 有啲強迫症，張枱執得好整齊，加分！

時間🕣：Booking System有待改善，暫時只可以whatsapp約，冇得睇available 時間，有啲麻煩。準時開始，剪頭髮過程45至60分鐘左右，mask 就敷20分鐘。
.
💈小插曲：阿哥剪完之後，發現個頭有啲位唔太滿意，食完晚飯番咗去再比佢哋修一修。想講嘅係，佢哋都好樂意聆聽同幫手改善。而大家如果係barbershop 剪完頭髮有想修飾嘅地方的話，真係真係唔洗怕醜講出嚟。因為barber們係一定會聽同會幫手修番好，務求大家滿意咁離開嘅。

最後，好彩佢哋營業時間去到晚上12點，夜啲去剪都唔怕。如果大家去開屯門，又或者好夜收工想剪頭髮，有興趣不妨上去睇睇。

Haircut: $250
Mask: $100
地址 : 屯門恒威工業中心B2座3樓13室 (屯門站行6分鐘)
營業時間: 
Wed Closed
Sunday - Tues. (1200-0000)

以上都係我哋個人意見，如果有唔同睇法歡迎留言或者DM我哋交流吓！