GATSBY- Moving Rubber

---

[𝗖𝗟𝗔𝗬]

數碼暴龍電影最近喺香港上映，不禁令我哋諗翻起好多兒時嘅回憶，諗起都眼濕濕。。。

有睇我哋story嘅話都知我哋會出一個回憶review。Gatsby相信都係大家細個會用嘅頭髮造型品牌，冇用過都可能會見過。究竟而家嘅我哋，返番轉頭用以前用開嘅產品會有咩feedback 呢？

品牌：Gatsby
產地：Japan 🇯🇵
試用產品：Moving Rubber

Overall: 4.5/10
光澤：2/10
軟硬度：2/10
持久度：6/10
清洗：5/10
香味：清新花香
適用於：十五年前的我

老實講，一開始買返嚟其實有啲驚好用過依家用開嘅product🤣，話哂依家用嘅產品都真係貴啲嘛。最後出嚟，相信大家睇相其實都可以見到個效果有咩分別。

過程: 上手好滑好易推，但就會感覺有一層油係手咁。香味係清新嘅花香🌼，算係一個優點，但就唔會好強同好持久。塑形方面，因為佢黏力hold力唔強，要較長時間先整到自己想要嘅造形，甚至要用比平時多一倍嘅份量先塑形成功。

效果嚟講，佢嘅hold力同層次感表現比較差。上面講過阿哥其實係用咗比平時double嘅份量，但出嚟嘅效果無論係層次感，hold力，豐盈感方面都比較遜色。上咗頭都唔係好覺有咩特別造型。不過，光澤度就用到佢本身嘅特點，啞色同幾自然。另外，天線頭問題都幾嚴重（圖5），上頭出街冇耐啲頭髮就飛起，應該係黏力不足所致。

另外好多謝眾多兄弟嘅提醒🙏🏿。有唔同嘅兄弟都指出產品對頭髮可能唔係咁健康。我哋上網睇過吓啲成份，再問過行家，發現其實又冇想像中對頭髮咁有害。只不過，又唔會對頭髮健康有益咁解囉。可能大家洗頭洗得徹底啲乾淨啲就得喇😉

Overall 嚟講，可能人大咗要求唔同咗，都真係唔會再用依隻moving rubber。但以前番學，追求gel 咗頭唔會比人發現，想平平哋買啲造形用品，又唔太在意產品成份，大家都可能都會有用過。原來依家用番以前用嘅產品，會有咁嘅感覺🤣

以上都只係個人睇法，始終每個人嘅喜好、感受，甚至係髮質都唔同。如果有啲咩意見或者分享，歡迎留言或者PM我哋交流一下心得🥰🙏🏻